Mark 14

Di hagataaele hagammuni o taaligi Jesus

(Matthew 26.1-5; Luke 22.1,2; John 11.45-53)

1Nia laangi e lua i mua Tagamiami Pasoobaa mo Tagamiami Palaawaa Digi Hagatanga, nia dagi aamua hai mee dabu, mo digau haga dondonu haganoho e halahala di ala hagammuni e kumi Jesus e daaligi gi made. ^a 2Digaula ga helekai, “Gidaadou hagalee hai di mee deenei i lodo di laangi Pasoobaa, gi dee wwaa hua nia daangada.”

Jesus e hagatulu i Bethany

(Matthew 26.6-13; John 12.1-8)

3Jesus nogo i Bethany i di hale o Simon, taane nogo magi genegene i mua. Di madagoaa hua a Jesus e miami, gei di ahina ga hanimoi mo dana loaabi-“alabaster” e honu lolo kala hui ngadaa ne hai gi nia “nard”, ga huge, ga hagatulutulu di libogo o Jesus. ^b 4Digau ala nogo i golo la gu hagawelewele, ga helekai i nadau mehanga, “Maeaha dela gu hagauwwou di lolo kala deenei? 5Maa bolo ne hui gi daha e mee hua di kila mai nia silber i hongo dolu lau, ga wanga gi digau hagaloale!” Gei digaula ga tamu di ahina deelaa. 6Gei Jesus ga helekai, “Diagia a mee. Goodou e haga madugidugia a mee eiaha? E humalia ge madamada dana hai ne hai mai gi di au. 7Digau hagaloale le e noho i godou baahi i nia madagoaa huogodoo, e mee hua di godou hagamaamaa i di ingoo hua di madagoaa dela e hiihai ginai goodou. Gei au e hagalee waalooloo i godou baahi. ^c 8Gei di ahina deenei ne hai go dana mee dela e mee. Mee ne hagatulutulu dana lolo kala gi dogu huaidina, belee hagatogomaalia au i mua dogu danu. 9Au e hagi adu gi donu goodou bolo nia gowaa huogodoo ala e dele ginai di Longo Humalia, dana mee ne hai, le e dele hogi, e haga langalangahia a mee.”

Judas gu baba bolo ia ga hagi anga a Jesus

(Matthew 26.14-16; Luke 22.3-6)

10Judas Iscariot, tangada i nia dama agoago dilongoholu maa lua, ga hana gi nia dagi aamua hai mee dabu, belee odi a Jesus gi digaula. 11Digaula gu tentene huoloo gi telekai a Judas dela ne hai ang gi ginaadou, ga hagababa bolo ginaadou e wanga nadau teenedi gi mee. Malaa, Judas ga daamada ga halahala dana madagoaa humalia belee wanga a Jesus gi digaula.

Jesus mo ana dama agoago e miami i Tagamiami Pasoobaa

(Matthew 26.17-25; Luke 22.7-14,21-23; John 13.21-30)

12Di laangi matagidagi o nia laangi llauehe o Tagamiami Palaawaa Digi Hagatanga, dela go di laangi e daaligi ai nia siibi o Tagamiami Pasoobaa, gei nia dama agoago a Jesus ga heeu gi mee, “Dehee dau gowaa e hiihai gimaadou gi hagatogomaalia ina dau Hagamiami Pasoobaa?” 13Jesus ga hagau dogolua ana dama agoago, ga helekai, “Hula gi di waahale damana deenaa, taane dela ga heetugi goodou, e kae dana mee kae wai, daudalia a mee. 14Gei goolua ga helekai gi tangada donu di hale dela ga ulu ginai mee, boloo, Tangada Agoago e helekai bolo dehee di ruum e humalia ang gi deia mo ana dama agoago, e hai di nadau Hagamiami Pasoobaa? 15Gei mee ga hagi adu dana ruum damana i nua, gu togomaalia. Deelaa di gowaa e hagatogomaalia gulu mee mai gi gidaadou.” 16Nia dama agoago ga hula gi di waahale damana, ga gidee nia mee huogodoo e hai be nnelekai a Jesus, gei meemaa ga hagatogomaalia Tagamiami Pasoobaa. 17Hiahi ia di mee, gei Jesus mo ana dama agoago dilongoholu maa lua ga hula gi Jerusalem. 18Di nadau noho e miami, gei Jesus ga helekai, “Au e hagi adu gi goodou bolo tangada e dahi i goodou la ga wanga au, tangada dela e miami dalia au dolomeenei.” ^d 19Gei nia dama agoago gu de nohomaalia gi telekai deelaa, ga hagadau dagidahi, e hai nadau heeu gi mee boloo, “Meenei, ma ko au dela e helekai iei goe?” 20Gei Jesus ga helekai, “Tangada e dahi i goodou dilongoholu maa lua dela ga hui dana palaawaa gi lodo di ibu dalia au, deelaa go mee. 21Tama Tangada le e made be nnelekai di Beebaa Dabu. Gei e huaidu huoloo ang gi tangada dela ma ga hagi anga Tama Tangada. E humalia maa tangada deelaa la hagalee ne haanau!”

Tagamiami o Tagi

(Matthew 26.26-30; Luke 22.14-20; 1 Corinthians 11.23-25)

22I di nadau miami hua, gei Jesus ga dahi aga dana palaawaa, ga danggee, ga ginigini, ga duwwe gi ana dama agoago, ga helekai, “Geina, deenei la go dogu huaidina.” 23Nomuli ga dahi aga dana ibu waini, ga danggee ang gi God, ga wanga gi digaula, huogodoo gu inu di maa. 24Jesus ga helekai, “Aanei la go ogu dodo ala e hali gi digau dogologo. Ogu dodo la di hagababa hoou a God. ^e 25Au e hagi adu gi goodou bolo au hagalee e inu di ibu waini deenei labelaa, ga dae loo di laangi au ga inu nia waini hoou i Tenua o God.” 26Nomuli hua di nadau daahili, digaula ga hula gi di Gonduu Olib.

Jesus e kokohp di haga de iloo a Peter

(Matthew 26.31-35; Luke 22.31-34; John 13.36-38)

27Jesus ga helekai gi digaula, “Goodou huogodoo ga llele dagidahi, ga diiagi au, i di Beebaa Dabu e helekai boloo:

God ga daaligi tangada hagaloohi siibi, gei nia siibi la ga lellele dagidahi. ^f
28Gei i muli dogu mouli aga, gei au ga hana i godou mua gi Galilee.” ^g 29Peter ga helekai gi mee, “Maeaha maa digaula ga diiagi goe, gei au la hagalee loo e diiagi goe!” 30Jesus ga helekai gi Peter, “Au e hagi adu bolo i mua teduu ga wolo haga lua boo nei, gei goe ga helekai haga dolu bolo goe e de iloo e-goe au.” 31Peter ga helekai maaloo, “Au hagalee loo e helekai bolo au e de iloo eau goe, maeaha maa au e hai gi made dalia goe!”

Nia dama agoago huogodoo ala i golo e helekai go telekai la hua.

Jesus e dalodalo i Gethsemane

(Matthew 26.36-46; Luke 22.39-46)

32Digaula ga dau i Gethsemane, gei Jesus ga helekai gi ana dama agoago, “Noho i ginei i dogu madagoaa e hai agu dalodalo.” 33Mee ga lahi a Peter, James mo John. Di manawa gee gu dau hogi i ono lodo, 34geia ga helekai gi digaula, “Ogu lodo gu manawa gee huoloo, be di mee ga hagahuaidu au gi made. Goodou noho i ginei mo di madamada gi daha.” 35Gei mee ga hana gi mada tanga i digaula, ga bala ia gi hongo nia gelegele, ga dalodalo be di madagoaa o di hagaduadua le e mee di doo gi daha mo ia, be di maa e mee. 36Mee ga helekai, “Abba, dogu Damana, goe e mee i nia mee huogodoo. Daawa di ibu o di hagaduadua gi daha mo au. Ma hagalee go dogu hiihai, go doo hiihai le e hai.” 37Gei mee ga hanimoi gi baahi ana dama agoago dogodolu, ga gidee digaula gu kii. Gei mee ga helekai gi Peter, “Simon, goe gu kii? Goe e deemee di haga ala i di aawaa hua e-dahi?” 38Mee ga helekai gi digaula, “Noho loloohi, dalodalo gi dee too goodou gi lodo di hagamada. Di hagataalunga le e mahi, gei tuaidina le e bagege.” 39Gei mee ga hana labelaa, ga dalodalo, ga dalodalo la hua go ana helekai ne hai i mua. 40Ga hanimoi labelaa gi nia dama agoago, gei digaula gu kii, gu deemee di haga ala. Digaula gu de iloo di nadau helekai gi mee. 41Tolu holongo ne hanimoi iei mee gi digaula, ga helekai, “Goodou e kii hua molooloo? Gu dohu di godou hagamolooloo! Di aawaa la gu dae mai! Mmada, Tama Tangada la ga wanga gi lodo nia lima digau huaidu. 42Goodou tuu i-nua, hula. Mmada, tangada dela e wanga au, la deenei gu hanimoi!”

Di lawalawa o Jesus

(Matthew 26.47-56; Luke 22.47-53; John 18.3-12)

43Jesus nogo leelee huaigolo, gei Judas, tangada i nia dama agoago dilongoholu maa lua, gu dau mai mo digau dogologo mo nadau hulumanu dauwa mono goloo heebagi. Digaula ne hagau mai go nia dagi hai mee dabu mo digau haga dondonu haganoho mo nia dagi mmaadua. 44Tangada hagi aga gu haga modongoohia gi tagabuulinga deelaa, “Taane dela ga hongi ko au, deelaa go mee. Lawalawa ina, lahia, hagaloohia gi humalia.” 45Di dau mai hua Judas, mee ga hanadu gi Jesus, ga helekai, “Tangada Agoago”, ga hongi adu a mee. 46Gei digaula ga lawalawa a Jesus gi mau dangihi. 47Tangada i digau ala e tuu i golo ga haga mmuu dana hulumanu dauwa, ga tuu talinga di hege a tagi aamua hai mee dabu. 48Jesus ga helekai, “Goodou e aha, ala e loomoi mo godou goloo heebagi belee lawalawa au, gu hai au be tangada gu ihala? 49Nia laangi huogodoo, gei au nogo agoago i lodo di Hale Daumaha, goodou nogo i golo, digi kumidia au. Gei nnelekai di Beebaa Dabu le e hai gi kila aga.” ^h 50Nomuli, gei ana dama agoago huogodoo ga diiagi a mee, ga llele gi daha. 51Tama daane e ulu di gahu malali, nogo daudali a Jesus, gei digaula belee lawalawa a mee, 52gei mee gu lele, gu diiagi ono goloo nogo ulu ai.

Jesus i mua di gowaa hai gabunga aamua

(Matthew 26.57-68; Luke 22.54,55,63-71; John 18.13,14,19-24)

53Digaula ga lahi a Jesus gi di hale o tagi aamua hai mee dabu, di gowaa e dagabuli nia dagi aamua hai mee dabu huogodoo, nia dagi mmaadua, mo digau haga dondonu haganoho. 54Peter e daudali a Jesus haga mogowaa, ga dau loo gi lodo di abaaba o di hale o tagi aamua hai mee dabu. Geia ga noho gi lala i baahi digau hagaloohi e haga mahanahana. 55Nia dagi hai mee dabu, mo digau hai gabunga aamua e hagamahi e halahala nadau hagamodongoohia hai baahi belee taaligi Jesus gi made, gei e deemee di gida di nadau mee. 56E dogologo digau haga modongoohia dilikai e hagahuaidu a Jesus, gei nia haga modongoohia digaula hagalee buni. 57Gei hunu daane ga tuu i-nua, ga helekai tilikai e hagahuaidu a Jesus, 58“Gimaadou gu hagalongo gi mee e helekai boloo: Au ga oho di Hale Daumaha dela ne hau go nia daangada, gei i muli hua nia laangi e dolu, gei au ga haga duu aga di maa, hagalee ne hau go nia daangada.” ⁱ 59Gei digaula hogi hagalee buni gi di kai e dahi. 60Tagi aamua hai mee dabu ga duu i-nua i mua digaula huogodoo, ga heeu gi Jesus, “Au helekai i golo ai gi nia hagahuaidu digaula ala e hai adu?” 61Gei Jesus e noho hua dee muu. Tagi aamua hai mee dabu ga heeu labelaa, “Goe go di Mesaia, Tama daane a God Aamua?” 62Jesus ga helekai, “K au go mee. Goodou huogodoo ga mmada laa gi Tama Tangada ga noho i di baahi gau donu o God Mogobuna, ga hanimoi i hongo nia gololangi.” ^j 63Tagi aamua hai mee dabu ga duu i-nua, ga haahi dono gahu ga helekai, “Gidaadou hagalee halahala tadau gau haga modongoohia i golo ! 64Goodou gu longono nia hagahuaidu a maa. Dehee di godou hiihai?”

Gei digaula ga helekai hai baahi, “Mee gu doo gi di hala, gu humalia hua dono hagamahemahe.” ^k 65Hunu gau i digaula e buibui nadau haawale gi mee, ga gahu nia golomada o maa, ga hagamamaawa a mee ga helekai, “Ma koai dela ne hagamaawa goe?” Gei digau hagaloohi ga lahi a mee mo di paapaa.

Peter e haga de iloo ia Jesus

(Matthew 26.69-75; Luke 22.56-62; John 18.15-18,25-27)

66Peter nogo i lodo di abaaba, gei di ahina hai hegau a tagi aamua hai mee dabu ga hanimoi laa dono baahi. 67Di madagoaa di ahina ne gidee Peter e haga mahanahana, geia ga mmada haga huudonu gi mee, ga helekai, “Kooe labelaa nogo madalia a Jesus o Nazareth.” 68Peter ga haga de iloo ia ga helekai, “Au e de iloo di mee dela e helekai iei goe,” gei mee ga hanadu gi di bontai, [gei teduu ga wolo.] 69Tama ahina ga mmada gi mee i golo, ga helekai labelaa gi digaula, “Mee tangada i digaula.” 70Gei Peter ga haga de iloo labelaa.

Nomuli hua, gei digau ala nogo tuu i golo ga helekai, “Goe e deemee di hagammuni i di goe tangada i digaula, tangada mai Galilee.” 71Gei Peter ga helekai, “Au e helekai di tonu bolo God gi hagahuaidu ina au, be au e helekai tilikai. Au e de iloo eau taane dela e helekai iei goodou!” 72Nomuli hua, gei teduu ga wolo i di lua wolo, gei Peter ga langahia nia helekai a Jesus ne hai, “I mua teduu ga wolo haga lua, gei goe ga helekai haga dolu bolo goe e de iloo e-goe au.” Nomuli hua, gei mee gu lodo huaidu huoloo, gu dangidangi manawa gee.